Yaponiyada cir teträw näticäläre

Yaponiyäneñ könbatışındağı İsikava töbägendä häm ul regiondağı Noto yarımutrawında bulğan cir teträwlärdä 48 keşeneñ ğomere özelde.

Yaponiya meteorologiya agentlığı kiçä bik küp sanda cir teträwlär terkälüen belderde. Alarnıñ magnitudaları 5 belän 7 ball arasında. Töbäkneñ yar buylarında śunami kisätüläre yasalğan ide, alar ğamäldän çığarıldı.

Cir teträwdän soñ yullarda cimereklär barlıqqa kilüe, Noto yarımutrawında yanğın çığuı häm 200gä yaqın qorılmanıñ zıyan kürüe belderelde.

Däwlät telekanalı NHK töşergän videolarda Vadjimada 7 qatlı binanıñ ber yaqqa awuı kürenä.

Töbäktä 50 meñgä yaqın keşe êvakuaśiyälängän. Törle noqtalarda kimendä 14 keşe qotqaruların kötä.

Xökümät räise Kisida Fumio Noto yarımutrawınıñ tön’yaq töbäklärenä ireşüneñ bik awır buluın citkerde. Anda yärdäm iltü öçen korablarnı qullanu kürsätmäse birelde. “Waqıt uzğan sayın hälakätneñ täêsire tağın da bilgele bula. Ğomerlärne qotqaru - waqıt belän yarışuğa tiñ,”-dide Kisida Fumio.

Yaponiyä geosfera mäğ’lümat üzäge yar buyındağı Vadjima töbägendä cirneñ 1,3 metr könçığışqa taba xäräkät itüe açıqlanuın xäbär itä.