Ğazzädä ülemnär arta

İzrail 7nçe oktyabr’dän birle köçle ut astında totuçı Ğazzä sızığında üterelgän fälästinlelärneñ sanı 20 meñ 258gä citte. Yaralılar – 53 meñ 688. Ğazzäneñ sälamätlek saqlaw ministrlığı bu mäs’älä belän bäyle yazmaça belderü yasadı.

İzrail höcümnärendä soñğı 24 säğat’tä 201 fälästinle ülgän, 368e yaralanğan.

BMOnıñ balalarğa yärdäm fondı (UNICEF) Ğazzädä açlıqnıñ “aşığıç xäl” däräcäsenä citüen belderep, 5 yäş’tän keçe 335 meñ balanıñ citärlek aşıy almaw arqasında ülem yanawı astında buluın xäbär itte.

Awrupa-Urta diñgez keşe xoquqları küzätü agentlığı şahitlarnıñ söyläwlärenä nigezlänep Ğazzädä ülgän 60 yäş’tän ölkän bik küp keşene İzrailneñ ülem cäzasına tartuın açıqlağan.  

İzrail Ğazzä sızığında 78 kön alıp baruçı genośid waqıtında Fälästinneñ mädäni mirasın da yuq itä. Höcümnärdä älegä qadär kimendä 13 ğazzäle şağıyr’ häm yazuçı üterelde. Hälaq bulğan jurnalistlarnıñ sanı isä 101gä citte.

Yaqın Könçığıştağı fälästinle möhacirlärgä yärdäm häm mäşğul’lek agentlığınıñ Ğazzä mödire Tomas Uayt Ğazzädä, säyäsi söyläşü şartlarına terälmägän, aşığıç gumanitar utnı tuqtatu häm yärdäm ağımına ixtiyac barlığın citkerä. “Ğazzädägelär – keşe, şaxmat taqtasındağı figuralar tügel. Alarnı tegendä-monda küçerep yörtep bulmıy. Bolay da bik küp keşe yäşägän cirlärennän kitärgä mäcbür buldı. Keşelär sıyınırday ışanıçlı urın yuq anda”- dide ul.

İzrail höcümnäre astında 7nçe oktyabr’dän birle 55 meñ toraq tulısınça yuq itelde, 23 xastaxanä êşkä yaraqsız xälgä kilde.