Kuveyt ämire wafat buldı
Şäyex Nävvaf äl-Äxmät äl-Cabir äs-Sabax 86 yäşendä ide
Kuveyt ämire şäyex Nävvaf äl-Äxmät äl-Cabir äs-Sabax 86 yäşendä wafat buldı. Bu xaqta ilneñ räsmi telekanalı aşa xäbär ittelär.
Şäyex Nävvaf 14 yıl täxet prinśı bulğannan soñ 2020nçe yılnıñ 29 sentyabrendä, üzennän aldağı ämir qardäşe Sabax äl-Äxmät äl-Cabir äs-Sabax ülgännän soñ, xakimiyätkä kilde. Ämir wazıyfasında 3 yıldan artıq il belän idarä itte.
Şäyex Nävvaf 1937nçe yılnıñ 25nçe iyünendä dön’yağa kilä. Xezmät yulın ul 1962nçe yılda Kuveytnıñ könçığışındağı Xavalli şähärendä gubernator wazıyfasınnan başlıy. 1978nçe yılda anı êçke êşlär ministrı itep bilgelilär. Ul ministrlıqqa qarawçı büleklärneñ üsterelüe häm alarnı zamança qorallar, xärbi cihazlar belän täêmin itü öçen tırışa.
Şäyex Nävvaf, Kuveyt Ğıyraqnıñ basıp aluınnan qotılğannan soñ, 1991nçe yılnıñ aprelendä tözelgän täwge xökümättä sośial’ êşlär häm mäşğul’lek ministrı bula. 2003nçe-2006nçı yıllarda ul qabat êçke êşlär ministrlığın citäkli.
Êlekkege Kuveyt ämire şäyex Sabax 2006nçı yılda wazıyfasına kilgäç täxet prinśı itep bertuğanı şäyex Nävvafnı täq’dim itä häm ul parlamentta qabul itelä.
Kuveytta 1921nçe yıldan 1950gä qadär 29 yıl xakimlek itkän ämir äl-Äxmät äl-Cabir äl-Möbärak äs-Sabaxnıñ 6nçı ulı şäyex Nävvafnıñ 4 ir häm 1 qız balası bar.
