4 Awrupa däwläte bombalawnı tuqtatırğa çaqırıp xat yazdı

İspaniyä, Bel’giyä, İrlandiya häm Mal’ta xökümäte räisläre Awrupa Berlege şurası räise Çarl’z Mişel’gä xat cibärep şuranıñ sammitında İzrail bombalawları astındağı Ğazzädäge xälgä qarata konkret poziśiyä alınuın soradı. Xatta 14nçe-15nçe dekabr’dä Brüssel’dä uzaçaq utırışlarda ike däwlätle çişeleşkä qarata da berdäm qaraşqa kilü öçen fiker alışunı kön tärtibenä kertü zarurlığı äytelä.  

İspaniyä xökümäte räise Pedro Sançes, Bel’giyä xökümäte başlığı Aleksandr de Kro, İrlandiya prem’yerı Leo Varadkar häm Mal’ta başministrı Robert Abela xatta “Xamas”nıñ 7nçe oktyabr’däge terrorçı höcümnären ğayepli häm İzrailneñ üzen xalıqara xoquqqa turı kiterep yaqlıy aluın iskärtä. Şul uq waqıtta, alar daimi utnı tuqtatu, Ğazzädäge grajdanlılarnı yaqlaw häm yärdämnärne kirtälärsez iltep citkerüne garantiyäläw öçen Awrupa Berlegeneñ urtaq qarar çuğaruı kiräklegenä basım yasıy.  

“Xamas”nıñ xärbi bülege “Qassam brigadaları” 7nçe okrtyabr’dä “Aqsa tufanı” iseme astında külämle höcüm başlawın citkerde. İzrail armiyäse moña cawap bularaq xärbi oçqıçlar belän Ğazzä sızığına “Timer qılıçlar” xäräkäte başlawın belderde.

Kiyerenkelek arta bara, xäzergä qadär bombalawlarda 18 meñgä yaqın fälästinleneñ ğomere özelde.