Gvineya Bissauda tüntäreleş bula yazğan

Gvineya Bissau ilbaşı Umarı Sissoko Êmbalo 1nçe dekabr’dä iminlek köçläre belän xärbilär arasında çıqqan bäreleşneñ tüntäreleş omtılışı buluın belderde. Ul üze bu waqıtta BMOnıñ klimat üzgärü konvenśiyäsenä kerüçe illärneñ kiñäşmäsendä qatnaşu öçen Dubayğa kitkän bula.  

Êmbalo matbuğatqa yasağan belderüendä älege adımnıñ citdi näticäläre bulaçağın assızıqlıy. Ul tüntäreleşneñ Gvineya Bissaunıñ Bäysezlek köne - 16nçı noyabr’dän alda planlaştırıluın häm bu turıdağı dälillärne jurnalistlarğa citkeräçäklären äytte.

Başqala Bissaunıñ kön’yağında häm Santa-Luiza töbägendäge xärbi berleklärgä yaqın noqtalarda 1nçe dekabr’ irtäsendä atqan tawışlar işetelä. Anda maxsus köçlär belän milli gvardiyä arasında bäreleş bula. Maxsus köçlär tınıçlıq urnaştıra.

Waqıyğalar finans ministrı Söläyman Säidi häm däwlät qaznası öçen cawaplı däwlät ministrı Antonio Monteyronı ber kön alda poliśiyä küzätüe astınnan Milli gvardiyä äğ’zalarınıñ aluı häm bilgesez urınğa iltüennän soñ buldı.  Älege ike ministr däwlät fondlarınnan 10 million dollarnı üzläşterüdä ğayeplänepe saq astına alınğan häm mäxkämägä çığarılğan.