İzrail belän “Xamas” äsir almaştı

İzrail belän “Xamas” arasında bulğan äsir almaşu kileşüe qısalarında İzrail törmälärendä utıruçı 39 fälästinle irekkä çığarıldı. Alarnıñ 24e xatın-qız häm 15e 18 yäş’tän keçe bala.

“Xamas” cibärgän 13 izraille äsir dä öylärenä qaytıp kitte. Alar İzrailgä kergännän soñ basıp alınğan Könbatış Yordan üzänlegendäge Ofer törmäsendä totılğan 39 fälästinle Xalıqara Qızılxac komitetı wäqalätlelärenä tapşırıla.

İrekkä çığuçılarnı qarşılaw öçen yözlärçä fälästinle Betuniya cirlegendä cıyıla. Alar Fälästin häm “Xamas” bayraqları kütärä.

İzrail xärbiläre cıyılğan fälästinlelärgä küz yäşen çığaruçı äçe gaz cibärä. Qarşı yaq isä feyerverklar ata.

İrekkä çığarılğan fälästinle äsirlärne utırtqan avtobuslar kilep citkännän soñ da İzrail xärbiläre ul tirägä cıyılğan fälästinlelärgä tınğılıq birmäde. Alarnı küz yäşen çığaruçı gaz häm tawış bombası belän taratırğa mataştılar.

İzrail häm “Xamas”  arasındağı bäreleşlärgä 4 kön gumanitar tänäfes birü turındağı kileşü 24nçe noyabr’ comğa könne cirle waqıt belän säğat’ 7dä ğamälgä kerde. Anıñ nigezendä “Xamas” qulındağı 50 izraille äsir hä moña cawap itep İzrail törmälärendäge 150 fälästinle irekkä çığaçaq. İke yaq ta xatın-qızlar häm balalarnı cibärä.