Ğazzägä 1 köndä 200 yök maşinası gumanitar yärdäm kerde

Misır kiçä irtän başlanğan gumanitar tänäfesneñ berençe könendä yärdäm töyälgän 200 yök maşinasınıñ qamalıştağı Ğazzägä kerüen belderde. Bu xaqta ilneñ matbuğat belän êlemtälär oyışması citäkçese Ziya Raşvan citkerde. Ul Ğazzägä kertelgän yärdämnär häm annan çığarılğan yaralılar turında sośial’ media aşa mäğ’lümat birde.

Töbäkkä gumanitar yärdäm tovarları ğına tügel, 2 aşığıç yärdäm maşinası, Yordaniya qır xastaxanäsenä qarawçı 15 yök maşinası häm Berläşkän Ğaräp Ämirlekläreneñ qır xastaxanäsenä qarawçı 11 texnika kergän.

Wäqalätle zat äytüençä, Ğazzädän 17 yaralançı Misırğa kiterelgän, alarnıñ 12sen däwalanu öçen qarawçıları belän bergä Törkiyä häm Berläşkän Ğaräp Ämirleklärenä alıp kitkännär. Ul 7nçe oktyabr’dä İzrail höcümnäre başlanğanda Misırda qalğan häm öylärenä qayta almağan 134 fälästinleneñ üz teläkläre belän Ğazzägä kerüen dä citkerde.

İsegezgä töşeräbez, İzrail belän “Xamas” arasındağı bäreleşlärgä 4 könlek tänäfes kiçä cirle waqıt belän säğat’ 7dä başlandı. Anıñ qısalarında Ğazzäneñ barlıq rayonnarına taratu öçen kön sayın 200 yök maşinası yärdäm belän 4 maşina yağulıq kerteläçäk.