Ğazzädä üterelgän häm qulğa alınğan balalar
20nçe noyabr’ - Bötendön’ya balalar xoquqları köne” uñayınnan ärnetüçe sannar dön'ya kürde
Fälästin mäğarif häm belem birü ministrlığı İzrail armiyäseneñ qamalıştağı Ğazzägä 7nçe oktyabr’dän birle däwam itüçe höcümnärendä 5 meñnän artıq balanıñ üterelüen belderde. Alarnıñ kübese uquçı.
Ministrlıq “20nçe noyabr’ - Bötendön’ya balalar xoquqları köne” uñayınnan yazmaça belderü yasadı. Anda mondıy yullar bar: “7nçe oktyabr’dän birle Ğazzägä höcümnärdä 5 meñnän artıq balanıñ ğomere özelde. Alarnıñ 3 meñnän kübräge uquçı”. Belderüdä Ğazzä genä tügel, İzrail basıp alığan Könbatış Yordan üzänlegendä dä 23 uquçı balanıñ hälaq buluı äytelä. “Älege sannarnıñ härberseneñ artında xıyal häm ömetlär belän tulı tormış bar ide…” diyelä anda.
Belderüdä balalar häm belem alu xoquqların yaqlawçı barlıq oyışma häm berläşmälärne “üz wäqalät mäydannarı êçendä cawaplılıq alırğa, arta baruçı xoquq bozular häm cinayät’lärne tuqtatırğa” çaqıru yasaldı.
Fälästin äsirlär cämğıyäte dä “20nçe noyabr’ - Bötendön’ya balalar xoquqları köne” uñayınnan İzrail qulğa alğan fälästinle balalar belän bäyle yazmaça belderü yasadı. Anda 7nçe oktyabr’dä Ğazzägä höcümnär başlanğannan birle qulğa alularnıñ yışayuı, barı oktyabr’ ayında ğına da 145 balanı alıp kitüläre äytelä. Yıl başınnan birle isä älege san - 880nän artıq. Xäzerge waqıtta 200läp fälästinle bala İzrail törmälärendä utıra.
