İzrail armiyäseneň Ğazzägä höcümnäre däwam itä

İzrail armiyäseneň blokada astındağı Ğazzägä höcümnäre däwam itä.

İzrail tön buyı Ğazzägä hawa höcümnäre oyıştırğan.

İzrail oçqıçları Cibaliya qaçaqlar lagerındağı Cibaliya sport klubı urnşqan töbäktä 12 yortnı bombağa totqan.

Qotqaru törkemnäre häm watandaşlar kim digändä 31 mäyet tapqannar.

Höcümdä ülüçelär häm yaralanğan keşelärne İndoneziya xastaxanäsenä ozatqannar.

İzrail xärbi oçqıçlarınıň Xan Yunısnıň könçığışındağı Äl-Aga häm Äbu Cämizä ğailäläreneň öylärenä höcümnärendä 10 keşe ğomeren yuğaltqan, alarnıň kübese balalar.

Cibaliya qaçaqlar lagerındağı Äl Fahura mäktäbe yanındağı Äs-Sevarike ğailäseneň yortın bombağa totu näticäsendä 6 keşeneň ğomere özelgän, küp keşe cäräxätlängän.

Cibaliya qaçaqlar lagerındağı bombalawda fälästinle milli voleybolçılar Xäsän Zaiter belän İbrahim Kasie dä ğomerlären yuğaltqannar.

Misır Räfax çik qapqasınıň yabılmawın, läkin İzrailneň yärdäm kertergä qomaçawlawın belderä.

İskärtep uzabız: “Xamas” oyışmasınıñ xärbi törkeme “İz-ad-Din äl-Qassam” brigadaları 7nçe oktäbrdä İzrailgä qarşı “Aqsa tufanı” dip ataluçı külämle höcüm başlawın xäbär itte.

İzrail armiyäse dä moña cawap itep xärbi oçqıçlar belän Ğazzädä “Timer qılıçlar” xäräkäte başlawın iğ’lan itte.

İzrailneň Ğazzägä höcümnärendä ülüçelär sanı 11 meňnän arttı.