Gebreyesus: "Ğazzädäge xälne söyläp añlatırlıq tügel"

Bötendön’ya sälamätlek saqlaw oyışması ğomum mödire Tedros Adxanom Gebreyesus 7nçe oktyabr’dän birle Fälästin cirlärendä mediśina ob’yektlarına qarata 218 höcümne raslawların belderde. Ul atnalıq matbuğat cıyılışında bäreleşlär säbäple 8 meñ 500dän artığı Ğazzädä, 1400e İzraildä – tulayım 10 meñnän kübräk keşeneñ ğomere özelüen äytte.

“Ğazzädä 21 meñnän artıq keşe yaralandı häm 1 million 400 meñnän kübräge yäşägän cirennän kitärgä mäcbür buldı. Andağı xälne äytep añlatıp bulmıy. Xastaxanälär koridorlarda yatuçı yaralılar belän tulğan häm morglar tulıp taşığan. Tabiblar narkozsız operaśiya yasıy,”-dip söyli Gebreyesus. Ul Ğazzädäge 36 xastaxanäneñ 14eneñ êşkä yaraqsız xälgä kildä buluın belderde. Qalğannarı da rizıq, su, generatorlar öçen yağulıq citmäwdän ğaciz.

Gebreyesus İzrailneñ Ğazzädäge 23 xastaxanäne êvakuaśiyäläwne taläp itüen, tik mondıy şartlarda yaralı keşelärne küçerüneñ yözlärçä tormışnı qurqınıç astına quyaçağın assızıqlıy. Ul soñğı 2 atnada Bötendön’ya sälamätlek saqlaw oyışmasınıñ Ğazzägä 54 tonna gumanitar yärdäm kertä aluın, tik monıñ barlıq ixtiyaclarğa cawap birü öçen bik az buluın äytä.