Ğazzägä yärdäm kertü röxsät itelmäyäçäk

İzrail armiyäse qamalıştağı Ğazzägä yärdäm kertü röxsät itelmäyäçägen belderde. Armiyä süzçese Daniêl Xagari uzdırğan matbuğat cıyılışı İzrail däwlät kanalı KANda translyaśiyälände.

“Bu êtapta Ğazzägä yärdäm kertü bulmayaçağın härkemneñ belüen telim. Ğazzäneñ çik qapqaları da yabıq. Monıñ belän bäyle qarar administrativ däräcädä qabul iteläçäk häm soñınnan tormışqa aşırılaçaq. Yärdäm kertüneñ waqıtı citkäç, monı beldererbez”-dide süzçe.

Xagari İzrailneñ tön’yağındağı kiyerenkelek xaqında da süz quzğattı. Ul Livannıñ kön’yağınnan açılğan utnıñ “Xizbullax” oyışmasınıñ röxsäte häm yärdäme belän yasaluın, “Xizbullax”nıñ monıñ öçen cawap biräçägen söyläde.

Süzçe äytüençä, 100dän artıq izraille yuqqa çıqqan häm ğailälärenä bu xaqta mäğ’lümat citkerelgän.

“Xamas” 7nçe oktyabr’dä İzrailgä qarşı “Aqsa tufanı” dip ataluçı külämle höcüm başlawın belderde. Ğazzädän İzrailgä taba meñnärçä raketa atıldı, qorallı törkemnär töbäktäge toraq punktlarğa kerde.

İzrail armiyäse dä xärbi oçqıçlar belän Ğazzädä “Timer qılıçlar” xäräkäte başlawın belderde.

Kiyerenkelek torğan sayın arta. İke yaqta da meñlägän ülüçe bar.