Putin - Räisi söyläşüe

Rusiya Federaśiyäse däwlät başlığı Vladimir Putin belän İran ilbaşı İbrahim Räisi telefonnan söyläşkännär.

Kreml’dän yasalğan belderügä qarağanda, söyläşüdä Qarabaxtağı waqıyğalar, Azärbaycan belän Ärmänstan arasındağı normal’läşü barışı turında süz barğan, problemalarnı säyäsi häm diplomatik yullar belän çişüneñ möhimlegenä basım yasalğan.

Yaqlar Törkiyä, Rusiya, İran, Azärbaycan, Ärmänstan häm Gruziyädän torğan “3+3” regional’ kiñäşmä platforması êşen aktivlaştıruda üzara fikerlären beldergännär.

Räisi İrannıñ “BRICS”qa quşılu möräcäğaten xuplağan öçen Rusiyägä räxmät äytkän.