Baş miye (миe) çipları keşelärdä sınala başlıy
İlon Masknıñ “Neuralink” şirkäte çipnı test itü öçen paraliçlı keşelär êzli
"SpaceX" häm "Tesla Motors" şirkätläreneñ xucası İlon Masknıñ baş miye (миe) çipı iniśiativası “Neuralink” keşelärdä berençe täcribäsen başlıy. Bäysez tikşerü oyışmasınnan röxsät alğan firma paraliçlı keşelär öçen baş miye implantınıñ klinik sınawları öçen awırular êzli. Anı umırtqasına zarar kilep paraliç suqqan xastalarda test itäçäklär.
Şirkät yaqınça 6 yıl baraçaq êşçänlekneñ qayda uzaçağın häm niçä qatnaşuçı bulaçağın beldermi.
“Neuralink” 2023nçe yılnıñ mayında baş miye çipı proyektın keşelärdä sınawnı başlaw öçen AQŞnıñ azıq-tölek häm daru kontrole idaräsennän röxsät aluın beldergän ide.
Monnan alda çiplarnı maymıllarda sınıylar. Alarnıñ baş miyendäge signallarnı uñışlı räweştä alıp cihazlarğa citkerüe terkälde.
Belgeçlär fikerençä, baş miye implantınıñ qurqınıçsız buluı dälillänsä dä, anı bazarğa çığaru öçen röxsät alu 10 yıldan artıqqa suzılırğa mömkin.
“Neuralink” 2016nçı yıldan birle baş miyenä urnaştırılaçaq mikroçiplar yärdämendä paraliç häm suqırayu şikelle nevrologik awırularnı däwalaw häm invalidlarnıñ tormış sıyfatın arttırunı maqsat itep quya.
Belgeçlär isä älege implantlarnıñ texnik häm iminlek problemaları kilep çığa aluına borçıla häm, şuna kürä, täcribälärneñ tağın da iğ’tibarlı häm kiñ külämle uzdırıluı kiräklege xaqında kisätä.
