Kim Çen In Rusiyädä

Tön’yaq Koreya liderı Kim Çen In utırğan bronepoyızd Rusiyägä barıp citte. İrtänge säğat’lärdä ul il çigen uzıp Yıraq Könçığış federal’ töbägendäge Primorskiy krayınıñ Xasan stanśiyäsenä kerde. Soñınnan poyızd Ussuriysk şähärennän Xabarovski yünäleşenä taba xäräkät itä. Rusiyä matbuğatında çıqqan xäbärlärgä qarağanda, anıñ qaya qadär baraçağı älegä bilgele tügel.

Kimnıñ Könçığış iq’tisadi forumında qatnaşu öçen Primorskiy krayındağı Vladivostok şähärenä kilgän Rusiyä däwlät başlığı Vladimir Putin belän oçraşuı küzallana.

Kreml’ süzçese Dmitriy Peskov ike lidernıñ Yıraq Könçığış federal’ töbägendä küreşäçägen, delegaśiyälärara oçraşu uzdıraçağın, kiräk bulsa, qara-qarşı utırıp ta söyläşäçen belderde. Monnan tış, Putinnıñ Kim xörmätenä kiçke aş mäclese oyıştıraçağı da äytelde. Söyläşülär kübräk ikeyaqlı mönäsäbätlär xaqında bulaçaq.

Amerika Quşma Ştatlarınıñ milli iminlek şurası strategik êlemtä koordinatorı Djon Kirbi uzğan ay yasağan belderüendä Tön’yaq Koreya belän Rusiyäneñ aktiv räweştä qoral söyläşüläre alıp baruın äytkän ide. “Bu söyläşülärdän soñ yuğarı däräcäle oçraşular kiläse aylarda däwam itärgä mömkin. Kileşülär tözep, Rusiyäneñ Tön’yaq Koreyadan Ukrainada qullanu öçen ähämiyätle külämdä häm törlärdä qoral aluı ixtimal,”-dide ul.

Uzğan atnada isä AQŞ matbuğatı Kimnıñ Putin belän qoral satışın söyläşü öçen Rusiyägä baraçağın alğa sörde.

Şul uq waqıtta Vaşington Tön’yaq Koreya liderın Mäskäwne qoral belän täêmin itmäskä çaqırdı.

Aq Yort milli iminlek şurası süzçese Êdriên Uotson “Yonhap” xäbär agentlığına belderüendä Kim belän Putinnıñ oçraşuında qoral kileşüe kön üzägendä bulaçağın assızıqladı. “Tön’yaq Koreyanı Pxen’yannıñ Rusiyägä qoral cibärü yäisä satu mäs’äläsendä cämäğat’çelekkä birgän süzlären totarğa çaqırabız,”-dide Êdriên Uotson.