Greśiyädä (Грециядә) su basularnıñ qorbannarı
Uzğan sişämbedä başlanğan köçle yañğırlar näticäsendä kilep çıqqan taşqınnarda ülüçelär sanı arta
Greśiyädä (Грециядә) su basular arqasında ğomere özelüçelär sanı 15kä citte. İlneñ yanğın sünderü xezmätennän yasalğan belderügä qarağanda, uzğan sişämbedä başlanğan köçle yañğırlar näticäsendä kilep çıqqan taşqınnarda ülüçelär sanı arta.
Afär töbägenä kilgän xökümät räise Kir’yakos Miśotakis su basu hälakäte kitergän zıyannı kompensaśiyäläw öçen Awrupa Berlegenä möräcäğat’ itäçägen belderde.
“Sişämbe irtän xökümät delegaśiyäse belän bergä Straśburgqa baram häm Awrupa Berlege komissiyäse räise Ursula fon der Leyen belän oçraşıp, Awrupanıñ bu zur hälakättän çığu öçen ilebezgä niçek yärdäm itä aluı turında söyläşäçäkmen,”-dide Miśotakis.
Greśiyä (Греция) xökümäte räise däwlätneñ su basu qorbannarına finans yaqtan yärdäm itäçägen häm cämäğat’çelekneñ sälamätlegen saqlaw öçen çaralar küreläçägen äytte. Afät töbägendä Könbatış Nil virusı oçraqları kürende. İlneñ sälamätlek saqlaw ministrlığı böcäklär häm qortqıçlarğa qarşı köräş mäs’äläsendä dä êşçänlek alıp barırğa ışandırdı.
Cirle matbuğatta çıqqan xäbärlärgä qarağanda, su basulardan zarar kürüçelär Larisa töbägendä xökümät räise Miśotakisqa qarşı protest çaraları oyıştırdı. Poliśiyä xalıqnı taratu öçen äçe gaz qullandı. İke arada çıqqan tartqalaşuda 9 iminlek xezmätkäre yaralandı, 20dän artıq protestçı saq astına alındı.
