AQŞta dawıllar küzätelä

Amerika Quşma Ştatlarınıñ könçığışında küzätelgän köçle dawıllarda berençe mäğlümatlarğa kürä 2 keşeneñ ğomere özelde.

AQŞnıñ Milli hawa torışı xezmäte Vaşington DC häm tirä-yağı öçen kisätü yasadı häm yaqınça 29 million yarım keşe yäşägän 10 ştatta ğarasat, köçle cil, êre boz häm öyermälärneñ küzätelä alınaçağın belderde.

Dawıllar arqasında Kön’yaq Karolina ştatında 15 yäş’lek ber bala dawılda qubarılğan ber ağaç astında qalıp, Alabama ştatında isä 28 yäş’lek keşe yäşen suğıp ülgän.

Könçığışta 2600 reys ğamäldän çığarılğan häm 7900 oçqıç säfäre kiçekterelgän.

AQŞnıñ Federal’ Aviaŝiya departamentı töbäktäge oçış yünäleşlären qabat bilgeläwlären citkerde.  

Dawıl küzätelgän ştatlardağı 1 million 100 meñ yort häm êş urınında ut bette.