Niger Baş ministrı xalıqara cämäğätçelektän yärdäm soradı

Mahamadou matbuğatqa yasağan belderüendä Könbatış Afrikada demokratiyanı yaqlawnıñ zarurlığına basım yasap, tüntäreleşçelärgä qarşı xalıqara cämäğätçelektän yärdäm soradı.

Xalıqara cıyılış öçen İtaliyağa baruın, tüntäreleşçelärneñ çik buyların yabuı arqasında ilenä qayta almawın belderüçe Mahamadou Franśiyädä (Франциядә) buluın citkerde.

Mahamadou tüntäreleş belän bäyle bularaq: "Bu fäläkät, çönki Niger sizger il. 4 million keşe azıq-tölek problemasın yäşi häm ildä 300 meñ qaçaq urnaşqan”, - dip äytte.

Malidä, Burkina Fasoda häm Gvineyada 2020nçe yıldan birle yäşängän tüntäreleşlärne xäterlätüçe Mahamadou Nigerdäge tüntäreleş citäkçelege tanılğan oçraqta Könbatış Afrikada demokratiyanıñ tulısınça qurqınıç astına keräçägenä basım yasadı.

Mahamadou: "Bu wazğıyät “EKOWAS” (Könbatış Afrika däwlätläre iq’tisad berlege) illäre öçen isän qalu, xalıqara cämäğätçelek öçen dä ışanıçlılıq mäs’äläse. Niger demokratik ber däwlät bularaq qalırğa tiyış”, - dip äytte.

Baş ministr Mahamadou: "Niger - töbäktä demokratiyanı yaqlaw häm kön’yaqtağı illärdä terrorçılıqnıñ cäyılüen totqarlaw öçen nigez taşı bulıp tora”, - dip bilgeläp uzdı.

Nigerdäge tüntäreleş

Nigerdä İlbaşı Muhammed Bazum 26nçı iyül’dä İlbaşı idaräse saqçıları polkı törkemnäre tarafınnan saq astına alınğan häm ul kiçen ğaskär citäkçelekne üz östenä aluın iğ’lan itkän ide.

İlbaşı idaräseneñ saqçılar polkı komandirı general Abdurrahman (Ömär) Tçiani 28nçe iyül’dä “Watannı saqlaw milli şurası” isemle xuntanıñ liderlığın üz östenä alğan häm küçeş xökümäten citäklägän ide.

EKOWAS isä 30nçı iyül’dä oyıştırğan çirattan tış yuğarı däräcäle oçraşuda İlbaşı Bazumnıñ azat itelüe häm yañadan wazıyfasına qaytuı öçen xärbi xuntağa ber atnalıq waqıt birgän ide.