NATO-Ukraina şurası cıyıla
Söyläşü kön tärtibendäge töp tema - Ukraina aşlığın Qara diñgezdän dönya bazarına cibärü
Çärşämbe könne NATO-Ukraina şurası Ukraina däwlät başlığı Volodimir Zelenskiynıñ çaqıruı belän Qara diñgezdän Ukraina aşlığın cibärü turında söyläşü öçen cıyılaçaq.
Litva başqalası Vil’nyusta uzğan NATO sammitında buldırılğan häm sammit waqıtında berençe cıyılışın ütkärgän şuranıñ bu ikençe oçraşuı bulaçaq.
NATO süzçese Oana Lungesku äytüençä, NATO ğomum särqatibe Yens Stoltenberg belän Ukraina däwlät başlığı Volodimir Zelenskiy söyläşkännär häm Rusiyäneñ Qara dingez aşlıq kileşüennän ber yaqlı bularaq çığuı turında süz alıp barğannar.
Lungesku bilgeläp uzğança, Stoltenberg NATO-Ukraina şurasın 26 nçı iyül’ könne tulı wäqalätle ilçelär däräcäsendä cıya.
Şura Ukraina citeştergän aşlıqnı Qara diñgezdän dönya bazarına cibärü turında söyläşäçäk.
Rusiyäneñ Ukrainağa höcümeneñ global’ azıq-tölek bäyälärenä yoğıntısın (йогынтысын) kimetü öçen Berläşkän Millätlär Oyışması, Rusiya, Türkiyä (Төркия) häm Ukraina 2022 nçe yılnıñ 22 nçe iyülendä İstanbulda Qara diñgez aşlıq koridorı kileşüenä qul quyğannar ide.
Uzğan atnada Kreml’ waqıtı betkän Qara diñgez aşlıq koridorı kileşüeneñ çınlıqta tämamlanuın, kileşüneñ Rusiyägä qağılışlı öleşeneñ ütälmäwen (үтәлмәвeн) häm tiyışle şartlar cirenä citkerelsä Rusiyäneñ aşlq kileşüenä kire qaytaçağın beldergän ide.
