Guterriş Rusiyäneñ Ukrina portlarına höcümen ğayepläde
Ul älege höcümnärneñ Rusiyä belän BMO arasındağı añlaşu memorandumın bozuın äytä
BMO ğomum särqatibe Antonio Guterriş Rusiyäneñ Odessa häm başqa Ukraina portlarına höcümnären qatğıy ğayepläde. Oyışmanıñ süzçese Stefan Dyujarrik (Дюжаррик) bu xaqta yazmaça belderü yasadı. Ul älege höcümnärneñ Rusiyä belän BMO arasındağı añlaşu memorandumın bozuın äytä. Dokumentta Rusiyäneñ Ukraina portlarınnan azıq-tölek, könbağış mayı häm aşlama êksportın ciñeläytüne qabul itüe belderelä.
“BMO ğomum särqatibe Rusiyäneñ Odessa häm başqa Ukraina portlarına höcümnären kisken ğayepli. Höcümnär grajdanlı asqormalarğa zarar birä häm bu xalıqara gumanitar xoquqnı bozu bula” dip yaza Dyujarrik.
BMO wäkile älege höcümnärneñ Ukraina tışına da täêsir itüen, östäwenä Rusiyäneñ Qara diñgez aşlıq koridorı kileşüen tuqtatuınıñ xäzerdän ük börteklelär häm kukuruz bäyälärenä yoğıntı yasawın, bigräk tä üsep kilüçe illärdäge xalıqqa zarar birüen citkerde. Ul Guterrişnıñ global’ açlıqqa qarşı häm totrıqlı azıq-tölek bäyäläre öçen tırışlığın däwam itäçägen asszıqladı.
