Aq Yortta tabılğan kokain

Amerika Quşma Ştatlarında yäkşämbe könne Aq Yortta tabılğan kokainnıñ kompleksnıñ şaqtıy qızu xäräkätle urınında buluı belderelde.

Aq Yort süzçese Karin Jan-P’yer köndälek matbuğat cıyılışında jurnalistlarnıñ sorawlarına cawap birde. Anda älege oçraq ta quzğatıldı.

P’yer äytüençä, narkotik matdä Aq Yortnıñ kiñ qullanıluçı Könbatış qanatında tabıla. Anda comğa, şimbä häm yäkşämbe könnärne qararğa kilüçelär öçen êkskurśiyälär oyıştırıla.

Jan-P’yer Yäşeren xezmätneñ älege mäs’äläne tikşerüen, ilbaşı Djo Baydenğa da mäğ’lümat birelüen citkerde.

İsegezgä töşeräbez, Aq Yortta 2nçe iyül’dä tabılğan şöbhäle matdäneñ ütkärelgän analiz näticäsendä kokain buluı açıqlandı.