Ukrainağa qarşı suğış cinayätlären tikşerü üzäge
Niderlandnıñ Gaaga şähärendä "Ukrainağa qarşı agressiya cinayäteneñ tikşerelüe öçen Xalıqara üzäk” (ICPA) “Awrupa Berlege cinayät’ êşendä mäxkämä xezmättäşlek” agentlığı (Eurojust) qarşında êşçänlegenä başladı
“Eurojust”nıñ Gaagadağı ğomum üzägendä oyıştırılğan matbuğat oçraşuında Xalıqara cinayät’ mäxkämäse (UCM) Baş prokurorı Kärim Xan, Niderland ğadälät (yustiśiya) ministrı Dilan Yäşilgöz-Zegerius, Ukraina Baş prokurorı Andriy Kostin, “Eurojust” Başlığı Ladislav Hamran, Awrupa komissiyasınıñ ğadälättän (yustiśiyadan) cawaplı komissarı Didier Reynders häm Amerika Quşma Ştatları ğadälät (yustiśiya) ministrlığınnan Baş prokuror urınbasarı Kenneth A. Polite qatnaştı.
Cıyılışta, Rusiyäneñ Ukrainada yasağan suğış cinayät’läreneñ tikşerelüe maqsatınnan çığıp tözelgän üzäkneñ êşçänlegenä başlawı belderelep, üzäk (ICPA) wazıyfasınıñ Ukrainağa qarşı höcüm cinayät’lärenä qağılışlı mäğ’lümat, dokument häm dälillärne cıyu, klassifikaśiyäläw, êşkärtü häm saqlaw buluı citkerelde.
“Eurojust”tan yasalğan yazmaça belderüdä üzäkneñ törle illärdän prokuror, belgeç häm poliśiya xezmätkärläreneñ cıyıluı belän buldırıluı iskärtelep uzıldı.
Belderüdä (ICPA) Üzäktäge belgeçlärneñ, Rusiyäneñ Ukrainağa qarşı höcüm cinayät’lären yasawın kürsätüçe dokumentlarnı häm dälillärne cıyıp saqlaw mäs’äläsendä xezmättäşlek urnaştıraçaqları äytelde.
(ICPA) Üzäkneñ Gaagadağı xalıqara mäxkämägä häm başqa oyışmalarğa yaqınlığınıñ ähämiyätle buluına basım yasalğan belderüdä üzäk êşçänlegeneñ kiläçäktä buluı mömkin xökem itelülärgä äzerlek täşkil itäçäge belderelde.
Belderüdä (ICPA) Üzäkneñ êşçänlege öçen kiräkle finanslawnıñ tulısınça Awrupa Berlege tışqı mönäsäbätlär xezmäte tarafınnan qaplanuı häm başlanğıç bularaq 8,3 million yevro külämendä fondnıñ täêmin itelüe iğ’lan itelde.
