Awrupa Berlege liderları migrantlar mäs'äläsendä kileşä almadı

Awrupa Berlege, Pol’şa häm Vengriyäneñ oppoziśiyäse säbäple, yaña urtaq migraśiya häm sıyınu qağıydäläre xaqındağı bäxäsne çişä almadı. Bel’giyä başqalası Brüssel’dä ike kön barğan sammit cıyılışında berlektäge illär älege mäs’älä belän bäyle belderge qabul itmäde.

Awrupa Berlege komissiyäse täq’dim itkän häm ay başında kvalifikaśiyäle küpçelek tarafınnan qabul itelgän “berdämlek mexanizmı”na Pol’şa häm Vengriyä qarşı çıqtı. Ul migrantlarnı här Awrupa Berlege ilenä mäcbüri taratu, alarnı qabul itmäwçe däwlätlärneñ isä här migrant öçen 20 meñ yevro tüläwen küzallıy.

Sammitnıñ kön tärtibendäge başqa temalar turında urtaq belderü çığarıldı, tik migraśiya mäs’äläsendä barı Awrupa Berlege şurası räise Çarl’z Mişel’nıñ imzası belän ber dokument dön’ya kürde. Anda bolay diyelä: “Pol’şa häm Vengriyäneñ êffektiv migraśiya häm sıyınu säyäsäte mäs’äläsendä konsensusqa ixtiyac barlığın, berdämlek çaraları qısasında migrantlarnı taratunıñ ixtiyarıy nigezlärgä tayanuın häm barlıq yärdämneñ berdäy bäyälänüen teläwläre terkälde”.  

Mişel’ sammit tögällängännän soñ bulğan matbuğat cıyılışında bu xaqta belderü yasadı. Ul bik küp ukrainalı migrant alğan Vengriyä häm Pol’şanıñ yana qağıydälärneñ kvalifikaśiyäle küpçelek tügel, berdäm tawış belän kertelüen sorawların, alarnıñ teläge nigezendä urtaq näticägä imza quyılmawın äytte.