Qorban bäyräme böten dönyada bilgeläp uzıla
Qorban bäyrämeneñ başlawı belän bergä dönyanıñ törle töbäklärendä dä bäyräm namazı öçen mäçetlär tuldı
Törekmänstan başqalası Aşxabadtağı Ärtuğrul Gazi mäçetenä baruçı yözlägän möselman mäçettä urın qalmağaç baqçasın tutırdı. İlbaşı Särdar Bärdimöxämmädov Qorban bäyräme mönäsäbäte belän bastırğan qotlawnamäsendä il xalqınıñ bäyrämen qotladı. İldä Qorban bäyräme mönäsäbäte belän 28nçe-30nçı iyün könnärendä yal iğ’lan itelde.
Azärbaycanda isä başqala Baqıda mäçetlärdä cıyılğan xalıq bäyräm namazın uqıdı.
Üzbäkstan İlbaşı Şäwkät Mirziyayıv ta, Qorban bäyräme mönäsäbäte belän yullama bastırıp, watandaşlarnıñ bäyrämen täbrik itte.
İzrail okkupaśiyası astındağı Könçığış Qodüsneñ İske şähär töbägendä urnaşqan Äl-Äq’sa mäçetendä distälärçä meñ möselman Qorban bäyräme namazın uqıdı. Qodüs İslami wakıflar idaräsennän yasalğan belderügä kürä, Äl-Äq’sa mäçetendä bäyräm namazı yaqınça 100 meñ keşe belän uqıldı.
Germaniya kanślerı Olaf Şol’ś häm êçke êşlär ministrı Nênsi Fezer da “Twitter”dan möselmannarnıñ Qorban bäyrämen täbrik itte.
Yaponiyada möselmannar Qorban bäyräme öçen başqaladağı Tokio mäçetendä cıyıldı.
Bosniya-Hersegovina başqalası Sarayevo-Bosniyadağı tarixi Gazi Hüsräv Bäy mäçete dä bäyräm namazın uqır öçen kilgän yözlägän möselmannı qabul itte.
Serbiya başqalası Belgradtağı berdänber mäçet bulğan “Bayraqlı”da da möselmannar bäyräm namazı uñayınnan bergä cıyıldı. İldä bosniyalı küpläp yäşäwçe Sancak töbägendäge mäçetlär dä bäyräm namazı öçen şığrım tulı ide.
Xorvatiya başqalası Zagreb belän ber ük isem belän yörtelgän mäçetkä kilgän möselmannar bäyräm namazınnan soñ ber-berse belän bäyrämläşte.
Tön’yaq Makedoniyada Qorban bäyräme mönäsäbäte belän üzäk cıyın Tön’yaq Makedoniya İslam berlege ximayäsendä oyıştırıldı, başqala Öskeptäge programma qısalarında törekçä, albança häm bosniya telendä mönäcätlär uqıldı.
Albaniyada isä bu bäyrämdä üzäk programma tradiśion bularaq başqala Tirandağı İskändär Bäy mäydanında küp sanda möselman qatnaşuında ütkärelde.
Kosovada da möselmannar Qorban bäyräme uñayınnan mäçetlärdä cıyıldı. Başqala Priştinädäge üzäk cıyın Fatih Soltan Mäxmät mäçetendä Kosova İslam berlege başlığı Naim Tırnava qatnaşuında uzdırıldı.
Niderlandta möselmannar bäyräm namazı öçen irtä belän mäçetlärgä bardı.
