Putin “Vagner” suğışçılarına çaqıru yasadı

Rusiyä däwlät başlığı Vladimir Putin “Vagner” törkemeneñ aqçağa yallanğan suğışçılarına yä Rusiyä saqlanu ministrlığı belän kileşü tözergä, yä êşlären taşlarğa yäisä Belarus’qa kitärgä quştı. Ul “Vagner” şirkäte citäkçese Yevgeniy Prigojinnıñ il idaräsenä qarşı kütärelüennän soñ televideniye kanalları aşa qabat xalıqqa möräcäğat’ itte.  

Putin “Vagner”nıñ ğamällärennäñ soñ teläktäşlek häm watanpärwärlek  öçen xalıqqa räxmät äytte. “Bu tınıç berdämlek şantajnıñ , êçke butalçıqlıq barlıqqa kiterergä mataşuçı teläsä-qaysı başlanğıçnıñ uñışsızlıqqa oçrayaçağın kürsätte,”-dide ul.

Putin waqıyğalarnıñ başınnan uq barlıqqa kilgän yanawnı täêsirsez itü, konstituśion tärtipneñ, watandaşlarnıñ tormışın häm tınıçlığın saqlaw öçen kiräkle barlıq qararlarnıñ kiçekmästän qabul itelüen assızıqladı, qorallı fetnäneñ här oçraqta bastırıluın belderde.

“Vagner” törkeme suğışçıları häm komandirlarınıñ kübeseneñ ber ük waqıtta xalqına häm däwlätenä bäyle rus patriotları buluın belä idek häm beläbez,”-dide Putin häm alarnı qullanırğa mataşuların äytte. Ul şul säbäple waqıyğanıñ başınnan birle turidan-turı üz kürsätmäläre belän qan tügelüen çikläw öçen adımnar yasaluın xäterlätte häm yalğışlıq yasawçılarğa qabat uylaw mömkinlege birülärenä basım yasadı. Putin tuğannar ütereşenä kermiçä döres qarar birgän “Vagner” suğışçılarına möräcäğat’ itep bolay dide: “ Bügen saqlanu ministrlığı yäisä başqa tärtip saqlaw köçläre belän kileşü tözep Rusiyägä xezmät kürsätüegezne däwam itü yäisä ğailägez häm duslarığız yanına kire qaytu mömkinlegegez bar. Teläwçelär Belarus’qa kitä ala. Birgän süzemne totaçaqmın. Qabatlap äytäm, saylaw sezgä qala, tik monıñ faciğale yalğışuın añlağan rus suğışçıları saylawı bulır dip ışanam”.  

Rusiyä saqlanu ministrlığı Ukrainada üz teläkläre belän suğışuçı ğaskärilär häm berleklärneñ 1nçe iyül’gä qadär armiyä belän kileşü tözüe kiräklegen belderde.