"Titanik"nı qararğa baruçılar yuqqa çıqtı

Boz tawına bärelep batqan häm 1514 keşe ülgän zinnätle yulçı korabı “Titanik”nıñ cimereklären turistlarğa kürsätü öçen qullanılğan su astı köymäse Atlantik okeanda yuqqa çıqtı. Anda 5 keşeneñ buluı belderelde.

6,4 metr ozınlığındağı köymä belän êlemtä çumudan soñ 1 säğat’ 45 minut ütkäç özelgän. Soñğı signal yäkşämbe irtän alınğan. Tulayım, su astı köymäseneñ yuqqa çığuına 24 säğat’tän tağın da kübräk waqıt uzğan.

BBCneñ xäbärenä qarağanda, Amerika Quşma Ştatlarınıñ Boston yar buyı iminlege törkemnäre su astı köymäsen êzli başladı. Êşçänlek hawadan da, diñgezdän dä alıp barıla.

Aviaśiya tarmağında xezmät kürsätüçe Angliyä şirkäte “Action Aviation”nıñ xucası, milliarder Xêmiş Xardingnıñ da älege su astı köymäsendä buluı belderelde. Anıñ ügi ulı Brayan Sas sośial’ media akkauntında ätiseneñ “Titanik”nı qararğa töşkän texnikada ikänlegen äytep, härkemne doğada bulırğa çaqırdı.

“Action Aviation” şirkäte dä waqıyğadan alda Twitterda: “Su astı köymäse uñışlı xäräkät itte. Xêmiş xäzerge waqıtta çuma” dip yazğan ide.  

Tarixi beleşmä: “Berqayçan da batmayaçaq” diyelgän zinnätle yulçı korabı “Titanik” 1912nçe yılnıñ 10nçı aprelendä 2 meñ 224 yulçı häm êkipaj belän N’yu-Yorkka baru öçen Angliyäneñ Sautgempton şähärennän yulğa quzğala. 15nçe aprel’dä ul boz tawı belän bäreleşkännän soñ Tön’yaq Atlantik suları astına kitä.

Hälakättä 1500dän artıq keşeneñ ğomere özelä, barı 710 keşe qotqarıla.