Greśiyädäge köymä faciğase
Yözlärçä keşene utırtqan korabnıñ batqançı 7 säğat' buyı yärdäm kötüre açıqlandı
Greśiyä sulıqlarında batqan häm êçendä bik küp sanda migrant hälaq bulğan köymäneñ su astına kitkänçe yaqınça 7 säğat’ diñgezdä xäräkätsez kötep toruı bilgele buldı.
BBCnıñ global’ korab küzätü säxifäse “MarineTraffic”tan alınğan mäğ’lümatlarına qarağanda, Greśiyä xökümäte kire qaqsa da, yözlärçä keşe utırğan köymä 7 säğat’ buyı tuqtap yärdäm kötkän.
Greśiyä yar buyı iminlege köymäneñ batqan waqıtta İtaliyägä taba xäräkät itüen äytkän ide. Alar sudnodan bernindi yärdäm çaqıruı kilmäwen häm sonğı minutqa qadär andağı keşelärneñ qurqınıç astında bulmawın alğa sörde.
Greśiyä xökümäte BBCneñ mäğ’lümatlarına älegä cawap birmäde.
14nçe iyün’dä Greśiyäneñ Peloponnes yarımutrawındağı Navarinnan 47 diñgez mile yıraqlığında xalıqara sularda migrantlarnı utırtqan balıqçı köymäse äylänep qaplandı.
Waqıyğada 78 keşeneñ ğomere özelde, 104 keşe qotqarıldı. BMOnıñ keşe xoquqları yuğarı komissarı Volker Türk köymä äylänep qaplanğannan soñ 500 keşeneñ yuqqa çığuın belderde. Alar arasında balalar häm xatın-qızlar küp.
