AQŞ Kongressında islamofobiya belän köräş qanun ölgese

Wäkillär Palatasınıñ Minnesota xalıq ışanıçlısı İlhan Omarnıñ räsmi internet säxifäsendä yasalğan belderüdä ölgegä N’yu Jersey senatorı Cory Booker häm Illinois xalıq ışanıçlısı Jan Schakowskyneñ urtaq imza saluı äytelde.

Ölgene Kongress äğ’zase 21 xalıq ışanıçlısınıñ xuplawı da iskärtelep uzıldı.

Senator Booker belderüdä İslamofobik söyläwlärneñ häm höcümnärneñ ildäge häm dönyadağı möselman cämğıyäteneñ iminlegenä häm mullığına yanarğa däwam itüenä basım yasağan bulsa, İlhan Omar da: "Möselmanlıqqa qarşı fanatizm global’ küreneş. Säyäsätne alıp baruçılar bularaq bezneñ bu problemalarnıñ ber-berse belän bäyläneşle häm global’ buluın añlawnıñ waqıtı citte,” – dip äytte.

Belderüdä İslamofobiyağa duçar bulğan Qıtaydağı uyğırlar, M’yanmada arakanlılar (rohinca) belän Hindstandağı häm Şri-Lankadağı möselman cämğıyätlär misal itep kürsätelep, Yaña Zelandiyada häm Kanadada aqtänle ıruğnıñ östenlegen yaqlawçılarnıñ da möselmannarnı nişan itep aluına iğ’tibar yünältelde.

Ölgedä AQŞ Däwlät departamentı tarafınnan möselman doşmanlığın küzätü häm köräş öçen maxsus wäkilneñ bilgelänelüe soralıp, ayıruça dönya külämendä İslamofobiya belän köräştä Amerika Quşma Ştatlarınıñ liderlığın urnaştıru öçen kiñ qırlı strategiyanıñ buldırıluı taläp itelä.

Booker häm Omar Kongressqa berençe tapqır 2021nçe yılnıñ 14nçe dekabr’ könne İslamofobiyağa qarşı qanun ölgesen täq’dim itkän, proyıkt Wäkillär Palatasındağı tawışqa quyuda 212gä qarşı 219 tawış belän qabul itelgän, Senatta isä kire qağılğan ide.