V’yetnam häm Laosta êsselek rekord yasadı

Kön’yaq-könçığış Aziyä däwlätläre V’yetnam häm Laos üz tarixlarında terkälgän iñ yuğarı cılılıqlarnı kürde.

V’yetnamnıñ Tuong Duong töbägendä 6nçı mayda temperatura +44,2 gradusqa citä, ä kürşe Laosnıñ Luangpxabang şähärendä termometrlar +43,5 gradusnı kürsätä.

Hawa torışı tarixçısı Maksimiliano Êrrera monıñ V’yetnamda xäzergä qadär terkälgän iñ yuğarı cılılıq buluın belderde. Laosta isä uzğan ay +42,7 gradus belän iñ yuğarı temperatura kürelgän ide. Tik atna axırındağı +43,5kä citkän êsselek älege rekordnı uzdı.

Kön’yaq-könçığış Aziyä regionı här yıl aprel’ häm may aylarında musson yañğırları başlanır aldınnan iñ êsse çornı kiçerä. Töbäktä temperaturanıñ kiläse könnärdä ğadättägegä kire qaytuı kötelä, tik tikşerenüçelär klimat krizisı artqan sayın moñarçı kürelmägän hawa şartlarınıñ tağın da kiñräk taralaçağın belderä.