Telefonnan küp söyläşü yuğarı qan basımı qurqınıçın arttırırğa mömkin
12 yıllıq tikşerenü näticäläre şunı kürsätkän
Atnağa 30 minut telefon aşa söyläşü yuğarı qan basımı qurqınıçın arttırırğa mömkin.
”Daily Mail” xäbärenä qarağanda, Qıtaynıñ Kön’yaq mediśina universitetı törkeme kesä telefonında söyläşü belän yuğarı qan basımı qurqınıçı arasında bäyläneş barmı-yuqmı ikänlegen tikşergän.
Tükşerenü qısalarında Angliyädä yaqınça 200 meñ keşene 12 yıl däwamında küzätep barğannar.
Tikşerenü kürsätkänçä, telefonnı atnağa 30 minut yäki annan kübräk qullanğan keşelärdä, az söyläşüçelärgä qarağanda, yuğarı qan basımı barlıqqa kilü qurqınıçı 12%qa yuğarıraq.
Könenä ber säğat’ telefon aşa söyläşüçelär – iñ zararlı törkemdä.
Şulay uq atnağa 6 säğat’tän artıq telefonnan söyläşüçelärdä yuğarı qan basımı ixtimalınıñ 5 minuttan azraq söyläşüçelärgä qarağanda 25%qa kübräk buluı açıqlandı.
Belgeçlär äytüençä, käräzle telefon qullanu belän yuğarı qan basımı arasındağı bäyläneş caylanmalar çığarğan tübän däräcädäge radio teträw yışlığı ênergiyäse belän bäyle bulırğa mömkin.
Alar yöräk sälamätlege öçen telefonnan söyläşülärne kimetü kiräklegen kisätä.
