İspaniyädä iñ êsse aprel' ayı

Qorılıq problemaları belän köräşüçe İspaniyädä cirle idarälär rekord däräcägä citüçe êsseleklärgä qarşı çara kürä başladı. Anda Afrikadan kilüçe dulqın belän temperatura ğadättägedän 10-15 gradusqa yuğarı. İldä statistika mäğ’lümatları terkälep bara başlağannan birle iñ êsse aprel’ ayı buldı.

İspaniyäneñ kön’yağındağı Andalusiyä töbägendä Kurtuba şähärendäge aêroportta 27nçe aprel’dä temperatura +38,7 gradusqa citte. Bu xäzergä qadär älege ayda terkälgän iñ êsse kön bularaq tarixqa kerde.

İspaniyädä ğadäti şartlarda cäyge aylarda kürelä torğan çaralar da irtä başlanğan cılılıqlar täêsirendä alğaraq küçerelde.

Kön’yaqtağı Andalusiya, Êstremadura häm Mursiyä şikelle kön’yaq töbäklärdän başlap bik küp cirle üzidarä qartlarnı häm sulış alu problemaları buluçılarnı kisätä. Alarğa töşke säğat’lärdä mäcbüri bulmağanda öydän çıqmasqa, küp itep su êçärgä, başlarına kiyärgä, qoyaştan saqlanu kremı qullanırğa häm çiktän tış küp aşamasqa kinäş itelä.

Başqala Madridta ğadättä iyün’ ayı başında qullanılışqa açıluçı däwlät basseynnarınıñ 13nçe maydan, yılğa buylarındağı plyajnıñ isä bu atnada açılaçağı belderelde. İctimağıy yärdäm oyışmalarınıñ törkemnäre uramda, bigräk tä, ölkännärgä su tarataçaq.