AQŞtağı qorallı höcümnärdän soñ Bayden belderü yasadı

Amerika Quşma Ştatları ilbaşı Djo Bayden kiçä tönlä Alabama häm Kentukkida bulğan qorallı höcümnärdän soñ Kongressnı qorallanu qanunnarına üzgäreşlär kertü öçen aktivlaşırğa çaqırdı.

Bayden yazmaça belderüendä Alabama ştatınıñ Deydvill şähärendä ber yäş’ keşeneñ tuğan kön kiçäsendä üterelgän 4 keşeneñ häm Kentukkinıñ Luisvill qalasında parktağı xalıqqa ut açu näticäsendä hälaq bulğan 2 keşeneñ matämen totuların citkerde. Ul xatını Djill Bayden belän yaralanuçılar häm höcümnärdän zıyan kürgän ğailälär öçen doğada buluların äytte

“Qorallar Amerikada balalarnı üterä häm sannar kimemi, arta ğına. Bu bik qurqınıç, monı qabul itärgä yaramıy,”-dide Bayden. Ul qorallanu mäs’äläsendä ğomerlärne saqlap qalaçaq qanunnar öçen yaxşı niyät belän êşlärgä äzer buluın assızıqlıy. AQŞ ilbaşı fikerençä, xalıq ışanıçlıları xökem itelü terkäwlären kontrol’ itü, qoral citeşterüçelärneñ cawaplılıqtan azat itelüen beterü, höcüm qoralları häm yuğarı sıydırışlı magazinnarnı tıyu şikelle mäs’älälärne qararğa tiyeş.

Alabama ştatınıñ Deydvill şähärendä kiçä tuğan kön bäyräm itüçelärgä qorallı höcüm buldı. Anda 4 keşeneñ ğomere özelde, kimendä 20 keşe yaralandı.

Kentukki ştatınıñ Luisvill qalasında isä şulay uq kiçä parktağı xalıqqa ut açtılar. Anda 2 keşe ülde, 4se yaralandı.