4 könlek êş atnası - sälamätlekne yaxşırta

Êş könnäre sanınıñ atnada 4kä qaldırıluı xezmätkärlärneñ üzlären tağın da sälamät häm bäxetle xis itülärenä säbäpçe bulğan. Belgeçlär monıñ belän bäyle tikşerü ütkärde. Aña qarağanda, atnada 4 kön êşläw borçılu häm stressnı kimetüdän başlap yoqı häm fizik künegülär öçen tağın da kübräk waqıt täêmin itügä qadär şaqtıy yaqtan xezmätkärlärneñ sälamätlegenä yaxşı yoğıntı yasıy.

Angliyäneñ Kêmbridj universitetında sośial’ fännär professorı Brendon Berçell älege tikşerenüdä qatnaşa häm 4 könlek êş atnasınıñ psixologik iminlekkä yoğıntısın analizlıy. “Bezneñ akademik skeptiśizmğa qaramastan, bu çınnan da uñay näticä buldı,”-di professor.

Tikşerenüdä qatnaşqan şirkätlärneñ kübese Böyekbritaniyädä urnaşqan. Alarnıñ yartısınnan kübräge xezmätkärlärenä düşämbe yäisä comğa könne östämä yal birä. Başqaları êtaplı programmalar yäisä atna buyı tağın da qısqa êş köne şikelle çişeleşlär täq’dim itä.

6 aylıq pilot çor buyı xezmätkärlärneñ urtaça atnalıq êş säğate 38dän 34kä qadär töşte.

Atnada 4 kön êşläwneñ bik küp xezmätkär öçen sälämatlekne tağın da yaxşırtuğa bärabär buluı belderelde. Qatnaşuçılarnıñ yaqınça 40% êş stressınıñ kimüen, 71%ı êmośional’ buşlıq xiseneñ azayuın äytte. 40%ında ruxi sälamätleklärenä yaxşı täêsir yasawı açıqlana. Törkemneñ ähämiyätle öleşe borçılu häm negativ xisläreneñ şaqtıy däräcädä yuq buluın söyli.

Xezmätkärlärneñ yaqınça 40%ı fizik sälamätlekläreneñ tağın da yaxşıruın belderä. Monıñ säbäbe xobbi, künegülär, aşarğa peşerü, ğailäläre belän waqıt ütkärü häm başqa êşçänleklärgä tağın da kübräk waqıtları barlıqqa kilü belän bäyläp qarala.

Tikşerenüdä qatnaşuçılarnıñ yaqınça yartısı täcribägä qadärge arığanlıqnıñ betüen, 40%ı isä tağın da äybäträk yoqlawların äytä.