Franśiyädä üz-üzeñä qul salu qanunlaştırılaçaq

Franśiyä ilbaşı Êmmanuêl’ Makron ildä yıl axırına qadär êvtanaziyä häm üz-üzeñä qul salunı da qolaçlawçı qanun tözätmäläre kertäçäklären citkerde. Ul älege mäs’älälärne qarawçı “Watandaşlar kongressı” seminarında täq’dim itelgän xisap nisbätennän Yelisey sarayında qayber wäqalätlelärne qabul itte.

Makron yuristlar, tabiblar, räsmi zatlar, watandaşlar häm säyäsätçelärdän toruçı delegaśiyägä möräcäğat’ itte häm alarnıñ 4tän öç öleşeneñ “tormışqa noqta quyu” mäs’äläsendä qanunlı êşçänleklär alıp baru turında fikeren äytüen söyläde.

Ul yıl axırına qadär kerteläçäk tözätmälär belän “franśuz stilendä tormışqa noqta quyu modele”n ğamälgä aşıraçaqların citkerde. Makron älege prośedura qısalarına keçkenä yäş’tägelär kermäyäçägen, monnan tış, êvtanaziya yäisä üz-üzeñä qul salunıñ teläsä-qaysı sośial’ säbäp arqasında da başqarıluına yul quyılmayaçağın äytte.

Franśiyä liderı ildä xäzerge waqıtta qanunnarnıñ citärlek däräcädä qolaçlamawına iğ’tibarnı cälep itte. Ul êvtanaziyä häm üz-üzeñ qul saluğa yärdäm itüneñ ciñelläşterelüenä täğayenlek kertmäde.

Franśiyädä qanun qısalarında êvtanaziyägä röxsät birelmäsä dä, 2016nçı yılda ğamälgä kergän tözätmä belän xastalıqnıñ soñğı êtabında bulğan keşelär öçen berniçä qağıydä qabul itelde. Ul sedativ anesteziyä belän awırunıñ tirän räweştä yoqlatıluın küz uñında tota.

Êvtanaziyädä awırunıñ ülemenä säbäpçe bulaçaq tıqşınu tıştan yasalsa, üz-üzeñä qul saluğa yärdämdä isä monı keşe turıdan-turı üze başqara.