Finlyandiyäneñ NATOğa kerüenä qarşı Rusiyä nişläyäçäk?

Rusiyä tışqı êşlär ministrı urınbasarı Aleksandr Gruşko Finlyandiyäneñ NATOğa kerüenä qarşı könbatış häm tön’yaq-könbatış yünäleşendä xärbi mömkinleklärne köçäytäçäklären belderde.  Ul ilneñ xäbär agentlığı “RİA Novosti”ğa interv’yusında ittifaqnıñ kiñäyüen bäyäläde. “Başqa NATO äğ’zaları xärbi köçlär häm texnikaların Finlyandiyägä urnaştırsa, Rusiyäneñ xärbi iminlegen nıqlı räweştä täêmin itü öçen östämä adımnar yasayaçaqbız,”-dide Gruşko.

2022nçe yılnıñ may ayında NATOğa kerü öçen möräcäğat’ itkän Finlyandiyäneñ quşılu protokolların Türkiyä Böyek Millät Mäclese xuplağannan soñ ittifaqnıñ 30 däwlätendä dä raslaw prośessları tögällände.

NATO ğomum särqatibe Yens Stoltenberg bügen Finlyandiyäneñ 31nçe äğ’za bularaq iğ’lan iteläçägen, bayrağınıñ ittifaqnıñ ştab-fatirında kütäreläçägen belderde.