Qıtay prezidentı Rusiyägä säfär yasayaçaq
Si Ŝzin’pin 20-22 mart könnärendä Mäskäwgä räsmi säfär belän baraçaq
Qıtay prezidentı Si Ŝzin’pin ileneñ Rusiyä-Ukraina suğışındağı totışı häm Rusiyä belän yaqınlığı bäxäsläşelgän çorda Mäskäwgä säfär yasayaçaq.
Qıtaynıñ tışqı êşlär ministrlığı süzçese Xua Çun’in açıqlaw yasap, Sinıñ Rusiyä däwlät başlığı Vladimir Putinnıñ çaqıruı belän 20-22 mart könnärendä Mäskäwgä räsmi säfär yasayaçağın citkerde.
Kreml’dan yasalğan açıqlawda da Putin belän Si söyläşüendä Rusiyä belän Qıtay arasındağı mönäsäbätlär häm strategik xezmättäşlekneñ qaralaçağı belderelde.
İke lider xalıqara ölkädäge xezmättäşlekne tiränäytü mäs’äläsendä dä fiker alışaçaq. Söyläşüdä qayber möhim dokumentlar imzalanaçaq.
Si Ŝzin’pin Rusiyä-Ukraina suğışı başlanğannan soñ berençe tapqır Rusiyägä bara.
Säfärneñ Qıtaynıñ Rusiyä-Ukraina suğışındağı totışı häm Amerika Quşma Ştatları belän geosäyäsi köndäşlektä Rusiyä belän yaqınayğan waqıtqa turı kilüe iğtibarnı cälep itte.
Bäyläneşle xäbärlär
Putin Ciñü könendä çığış yasadı
Bügen Rusiyädä İkençe Bötendön’ya suğışınıñ tögällänüen bilgeläp uzalar