Parijda uram cıyıştıruçılarnı mäcbüri êşlätälär

Franśiyä başqalası Parijda iminlek idaräse şähärdä barlıqqa kilgän meñnärçä tonna çüp öyemnäreneñ keşelär sälamätlegenä yanawın belderep, rizasızlıq yözennän êş taşlağan cıyıştıruçılarnı mäcbüri êşlätä başladı.  

İlneñ êçke êşlär ministrı Djeral’d Darmanin franśuz radiosı RTLğa interv’yusında bu xaqta söyläde. Anıñ äytüençä, çüp öyemnären cıyıştıru öçen Parij xakimiyäte çaralar kürä başlağannan soñ protest belderüçe êşçelärneñ ber öleşen mäcbüri êşkä çığaru prośedurasına küçü kürsätmäse birelgän.

Darmanin prośeduranıñ irtän ük ğamälgä aşırıla başlawın häm poliśiyä saylap alğan keşelärneñ uramnarnı cıyıştırırğa totınuın söyläde.

Franśiyädä däwlät xezmäteneñ özleksezlegenä yäisä cämğıyät’ ixtiyaclarına citdi räweştä ayaq çala torğan oçraqlarda rizasızlıq çaralarındağı xezmätkärlärneñ ber öleşen êşkä kire qaytırğa mäcbür itä alalar. Moña qarşı kilüçe êşçelär isä 6 ayğa qadär iregennän mäxrüm itelergä yäisä 10 meñ yevro ştrafqa tartılırğa mömkin.  

Franśiyädä xökümätneñ pensiyä yäşen êtaplap 62dän 64kä citkerüne maqsat itep quyğan reformasına qarşı il külämendä ğıynvar ayınnan başlap 8 tapqır massaküläm êş taşlaw buldı.  Parij cıyıştıruçıları bu ay başınnan birle êş urınnarına çıqmıy ide.

Xökümät başqala uramnarında barlıqqa kilgän çüp öyemnäre öçen mêriyäne ğayepläde.