Malavida milli afät iğ’lan itelde

Malavi däwlät başlığı Lazarus Çakvera ilneñ kön’yağında 100 dän kübräk keşeneñ ülemenä kitergän Freddi ğarasatı arqasında 10 töbäktä milli afät iğ’lan itte.

İlbaşı idaräse särqatibe Kollin Zamba xökümätneñ böten köçe belän afättän zıyan kürgännärgä yärdäm kürsätergä tırışuın belderde, cirle häm xalıqara oyışmalarnı bu êşkä bulışırğa öndäde.

Malavi poliśiyäse beldergänçä, xäzergä çaqlı 100 dän artıq keşeneñ mäyete çığarılğan.

Töbäktä transport xezmäte kürsätelä almıy, mäktäplär yabıq.

Bötendön’ya meteorologiya oyışması berence tapqır 21 nçe fevral’dä Madagaskarda, 3 könnän soñ Mozambikta küzätelgän Freddinıñ tarixta iñ ozaq däwam itkän ğarasat bulırğa mömkinlegen beldergän ide.

Berençe ğarasatta Madagaskarda 226 meñ, Mozambikta 163 meñ keşe zıyan kürde, distälägän keşeneñ ğomere özelde.