Bäyrämgä äzerlängändä 15 keşe ülde

İranda xicri kalendar’ Şämsi nigezendä yılnıñ soñğı çärşämbese tönendä uzuçı “Çärşämbe suri” bäyrämenä äzerlek barışında älegä qadär il külämendä 15 keşeneñ ğomere özelde, 353 keşe isä cäräxätlände.

İrannıñ räsmi xäbär agentlığı İRNA yazğança, qazalar Täbriz Tähran, Xämädan, Urumiyä häm Kavzin şähärlärendä bulğan. İran aşığıç yärdäm üzäge başlığı Cafär Miadfer yaralanğan 353 keşedän 49ınıñ xastaxanädä yatuın, 6sınıñ reanimaśiyädä buluın belderde.

Bäyrämgä äzerlek barışında bulğan bäxetsezlek oçraqlarında 51 keşe ayaq-qulın yuğaltqan, 130 keşe törle däräcädä peşkän, 86 keşeneñ küze cäräxätlängän. İñ küp ülemnär başqala Tähranda terkälgän.

İranda yaña yıl Näwrüzdan alda yılnıñ soñğı çärşämbe tönendä uzuçı bäyräm çaralarında, bigräk tä, balalar häm yäş’lär uçaq östennän sikerä, feyerverklar attıra häm bengal’ utların yandıra. Bu çaralar häm aña äzerlek yıl sayın İranda distälärçä keşeneñ ülemenä, yözlärçäseneñ yaralanuına säbäpçe bula.  

Xicri kalendar’ Şämsi qullanıla torğan İranda yaña yıl 21nçe martta Näwrüzdä başlana.