Greśiyädä poyızd hälakätendä ülüçelärneñ sanı arttı

Greśiyädä çärşämbe könne bulğan poyızd hälakätendä ğomere özelüçelärneñ sanı 57gä citte.

Greśiyä däwlät telekanalı ERTnıñ xäbärendä äytelgänçä, Larisa şähäreneñ tön’yağındağı Tempi töbägendä yulçı poyızdı belän yök poyızdınıñ bäreleşüe näticäsendä qayber vagonnar rel’slardan çıqtı häm alğı vagonnarğa ut qaptı. Anda yaralanğan 48 keşeneñ xastaxanädä däwalanuı däwam itä. 6sınıñ xäle bik awır. 56 keşe äle haman yuqqa çıqqan sanala.

Hälakät waqıtında çıqqan yanğın säbäple êzläw-qotqaru êşläreneñ qıyınlıq belän baruı häm cimereklär arasınnan çığarılğan mäyetlärne tanuda awırsınuları belderelä. Yuğalğan keşelärneñ ğailäläre DNK testı öçen ürnäk birgän.

Greśiya tışqı êşlär ministrı Nikos Dendias sośial’ media akkauntı aşa teläktäşlek beldergän härkemgä räxmät äytte. “Xalqıbızğa yärdämgä äzer buluların beldergän dön’yanıñ här poçmağındağı barlıq keşelärgä räxmät yawsın. Grek diplomatik häm konsullıq wäqalätlelärenä igelekle teläklären citkergän keşelärgä tirän räxmätemne äytäm” dide ul.  

Greśiyä ilbaşı Katerina Sakellaropulu, xökümät räise Kir’yakos Miśotakis, sälamätlek saqlaw ministrı Tanos Plevris häm başqa säyäsätçelär hälakät bulğan cirlekkä barıp wäzğıyät’ne üz küzläre belän kürde.

Greśiyä xökümäte il tarixındağı iñ ülemçel poyızd hälakätennän soñ 3 könlek matäm iğ’lan itte.

Süz uñayınnan, Afinada älege hälakätkä qarata protest çaralarına çıqqan meñnärçä keşe Êllin poyızdı şirkäte ofisları urnaşqan binanıñ qarşında oçraşıp, annan parlament binasına taba kitte. Alar “Hälakät tügel, cinayät’” dip yazılğan bannerlar kütärde häm ğayeplelärneñ tabıluın taläp itte.