AQŞta Kovid-19 turında qanun

Amerika Quşma Ştatları senatında Kovid-19nıñ kilep çığışı belän bäyle küzläw oyışmaları açıqlağan mäğ’lümatlärne cämäğat’çelekkä citkerüne kiräktergän qanun ölgese qabul itelde.  Kongressnıñ öske palatası Senat älege dokumentnı rasladı. Ul AQŞ milli küzläw oyışması citäkçesen bu tördäge mäğ’lümatlarnı urtaqlaşırğa mäcbüri qıla.

Qanun proyektın cömhüriyätçe senatorlar Djoş Xouli häm Mayk Braun täq’dim itä häm ul bertawıştan qabul itelä.

Proyektta Kovid-19 kizüeneñ Uxan’ virusologiya institutınnan çıqqan buluına ışanu öçen säbäplär barlığı belderelä. Şuña kürä älege fänni ob’yekttağı tikşerenüçelär turındağı mäğ’lümatlarnıñ da urtaqlaşıluı soraldı.  

Älege qanun ölgese 2021nçe yılda Senatta qabul itelde, tik Wäkillär palatasında kön tärtibenä quyılmağan ide. Anıñ ğamälgä kerüe öçen ike palatada da raslanıp, soñınnan ilbaşı Djo Baydennıñ imzalawı kiräk.  

“Wall Street Journal” gazetı AQŞ ênergetika ministrlığınıñ küptän tügel Aq Yortqa häm ähämiyätle Kongress äğ’zalarına yäşeren küzläw mäğ’lümatları citkerüen yazdı. Anda Kovid-19nıñ yalğışlıq belän Qıtaydağı laboratoriyädän çığuı turında äytelüe belderelä.   

Milli iminlek kiñäşçese Djeyk Sallivan küzläw cämäğat’çelegendä bu mäs’älädä törle qaraşlar buluın, tik tulısınça ışanu öçen nigez citärlek tügellegen söyläde.

Federal’ tikşerü byurosı FBİ başlığı Kristofer Rêy isä koronavirusnıñ Qıtaydağı laboratoriyädän oçraqlı räweştä sarquı ixtimalın qarawların äytte.