Tön'yaq Koreya kürşelärenä yanıy

Tön’yaq Koreyanıñ cir astı atom-töş sınaw qorılması Punggi-ri, üz xalqınnan tış, Kön’yaq Koreya, Yaponiyä häm Qıtaydağı millionnarça keşegä yanıy.

Kön’yaq Koreyanıñ cirle matbuğatında urın ağlan xäbärgä qarağanda, başqala Seuldağı keşe xoquqları törkeme äzerlägän xisapta töbäktä millionlağan keşe qullana torğan su çığanaqlarınıñ älege atom-töş sınaw qorılmasınnan taraluçı radioaktiv matdälärgä duçar buluı belderelä. Anda äytelgänçä, ob’yekt tiräsendäge millionlağan keşe yäşi torğan 8 şähär häm bistägä qurqınıç yanap qına qalmıy, awıl xucalığı häm balıqçılıq tovarları arqasında Kön’yaq Koreya, Yaponiyä häm Qıtaydağı bik küp keşegä zıyan sala ala.

Xisapta tikşerenü näticäläreneñ atom-töş häm mediśina belgeçläre belän bergä BMO häm Kön’yaq Koreya xökümäteneñ küzläw çığanaqlarına tayanuı belderelde.

Keşe xoquqları törkeme liderı häm Tön’yaq Koreyalı tikşerenüçe X’yubert Yang-xvan Li bu mäğ’lümatlarnıñ ähämiyäten assızıqlap bolay di: “Älege xisap Tön’yaq Koreyanıñ atom-töş sınawlarınıñ barı üz xalqınıñ ğına tügel, Kön’yaq Koreya häm başqa kürşe däwlätlärdäge tormış häm sälamätlekkä yanawı nisbätennän möhim”.