"Ruslar cibärgän 71 raketanıñ 61en yuq ittek"

Ukraina hawa köçläre komandalığı Rusiyäneñ ildäge kritik ähämiyätkä iyä asqormalarğa höcüm itü öçen cibärgän 71 raketasınıñ 61eneñ yuq itelüen belderde.

Komandalıqtan citkerülärençä, kiçä rus köçläre külämle höcümnär yasağan. Rusiyä armiyäse Xäzär diñgeze häm Rusiyäneñ Volgodonsk şähäre yağınnan 8 Tu-95MS strategik bombalaw oçqıçı belän Ukrainağa hawadan bärgän. Monnan tış, rus köçläreneñ Qara diñgezdäge korablarınnan Kalibr raketaları oçırtılğan.

“Doşman cirle waqıt belän säğat’ 11.30dan başlağ 71 qanatlı raketa oçırttı. Ukraina hawa köçläre üz köçe häm texnikası belän doşmannıñ 61 raketasın, 5 kamikadze keşesez hawa apparatın yuq itte” diyelä belderüdä.

Ukraina däwlät başlığı Volodimir Zelenskiy sośial’ media aşa yasağan belderüendä Rusiyäneñ grajdanlılarnı häm tınıç tormış asqormaların nişanğa aluın belderde.

“Qızğanıçqa, ülüçelär bar. Yaqınnarınıñ qayğısın urtaqlaşam,”-dide ul.

Zelenskiy qayber rus raketalarınıñ Moldova häm Rumıniyä hawa mäydanınnan uzuın äytep, alarnıñ NATOğa, kollektiv iminlekkä yanaw buluın häm tuqtatılırğa tiyeşlegen söyläde.