Çilida urman yanğınnarın sünderä almıylar

Çilineñ üzäk häm kön’yaq öleşendä xakimlek itüçe urman yanğınnarında ğomere özelüçelärneñ sanı 22gä citte.

İlneñ êçke êşlär ministrı Karolina Toxa yasağan belderüdä ülüçelär sanınıñ gel üzgärep toruı äytelä. “Xäzerge waqıtta ğomere özelgän 22 keşebez bar, awır xäl, ärnetkeç sannar belän oçraştıq,”-di ul.

Cirle matbuğatta çıqqan xäbärlärdä xastaxanädä däwalanuçı 16 keşenen kritik xäldä buluı citkerelä.

Köçle yanğınnardan kübräk Nuble, Biobio häm La Araukaniya töbäkläre zıyan kürä. Anda 50dän artıq yanu urını bar. Xäzergä qadär 45 meñ gektardan kübräk mäydan kölgä äwerelgän.

İlneñ ğadättän tış xäl iğ’lan itelgän urınnarında, cirdän häm hawadan köçle sünderü êşçänlege baruına qaramastan, yanğınnarnın däwam itüe äytelä.

Awıl xucalığı ministrı Êsteban Valensuêla urman yanğınnarı belän köräşü öçen cibärelgän ber boralaqnıñ kilep töşüen belderde.  

Yangınnıñ toraq punktlarğa yanawı säbäple meñnärçä keşene êvakuaśiyälägännär. Yözdän artıq öyneñ tulısınça yanıp betüe äytelä. Östäwenä ilneñ kön’yaq töbäklärendä êsse hawa dulqını yoğıntısın kürsätä: temperatura +40 gradusqa citte.

Köçle yanğınnarnı sünderüdä armiyä dä qatnaşa.

Çili ilbaşı Gabriêl’ Boriç üzäk häm kön’yaq regionnarda ğadättän tış xäl iğ’lan itelüen beldergän ide.