Avstraliyädä yuğalğan radioaktiv kapsula tabıldı

Avstraliyädäge wäqalätlelär yuğaluı inde berniçä könnän birle panikağa säbäpçe bulğan radioaktiv kapsulanıñ tabıluın xäbär itte.

Töbäkneñ ğadättän tış xällär xezmätläre ministrı uzğan atnada Könbatış Avstraliyädä yuqqa çıqqan häm 1 meñ 400 çaqrımlıq marşrut buyınça êzlängän älege kapsulanıñ tabılu söyençe belän urtaqlaşqannan soñ cirle xalıq ciñel sulap quydı.  

Radioaktiv kapsula şaxtaçılıqta ülçäw maqsatınnan qullanıla. Anı N’yuman töbägendäge şaxta mäydanınnan Perttağı saqlaw urınına taşığan waqıtta töşerälär.

Wäqalätlelär citkergänçä, kapsula 12nçe ğıynvarda tözekländerü öçen Pertqa cibärelgän häm başta yaxşılap törelgän. 16sında ul tiyeşle urınğa barıp citä häm yuğarı saq astındağı radiaśiyä skladına quyıla.  

Tik 25nçe ğıynvarda paketnı açıp qarağanda ülçäw cihazınıñ zıyan kürüe häm kapsulanıñ yuqqa çığuı kürenä.

Wäqalätlelär xalıqnı kapsulağa qağılmasqa çaqırdı. Matdäneñ nurlanış peşülärenä häm şuña bäyle başqa awırularğa kiterüe turında kisättelär.