Prinś Garrinıñ memuarları satuğa çıqtı

Angliyä patşa ğailäsennän ayırılıp Amerika Quşma Ştatlarına kitep urnaşqan Sasseks gerśogı prinś Garrinıñ bäxäslärgä säbäp bulğan “Spare” isemle memuarları satuğa çıqtı. Başqala Londondağı qayber kitap kibetläre satıp aluçılarnıñ sorawın qanäğat’länderü öçen tön urtasında açıldı. Kitapnı iñ berençelärdän bulıp alırğa teläwçelär şähärneñ Viktoriyä stanśiyäsendäge kitapçıda çiratqa tezelde.

Angliyäneñ kitap kibetläre çeltäre Waterstones citkergänçä, prinś Garrinıñ memuarlarına aldan zakaz birep quyuçılar sanı şulqadär küp bula, soñğı 10 yılda berençe tapqır mondıy ajiotaj kürelä.   

Kitap inglizçädän tış tağın 15 teldä basıla. Aña dön’ya külämendä soraw zur buluı bilgele.  

Prinś Garrinıñ qızıqsınıp kötelgän memuarları bilgelängän kön -10nçı ğıynvardan alda İspaniyädä yalğış satuğa çıqqannan soñ kitaptağı qayber bülemnär matbuğatta taraldı. Berençelärdän bulıp alarnı “The Guardian” gazetı üzeneñ uquçıları belän urtaqlaştı.

Garri kitabında abıysı prinś Uil’yamnı üzenä qul kütärüdä ğayepli, Angliyä patşabikäse Êlizabet 2nçeneñ ülemen BBC aşa belüen äytä häm xatını Megan Markl belän tanışqançı fanatik buluın yaza. Ber bülemdä isä ul Äfğanstanda 25 keşene üterüen häm monıñ öçen oyalmawın äytep uza.

Ayırım alğanda, prinś Garrinıñ Äfğanstan belän bäyle süzlärenä Angliyädäge qayber dairälär dä, Taliban wäqalätleläre dä zur qanäğat’sezlek belderde.