Tön'yaq Koreya "Vagner"ğa qoral sata
Aq Yort Rusiyäneñ Ukrainadağı suğışta qullanu öçen Tön'yaq Koreyadan raketalar satıp aluın citkerde
AQŞnıñ Aq Yort milli iminlek şurası strategik êlemtä koordinatorı Djon Kirbi Tön’yaq Koreyanıñ Rusiyädäge yallı xärbi şirkät “Vagner”ğa Ukrainadağı suğışta qullanu öçen qoral satuın belderde.
“Vagner” Rusiyäneñ Ukrainadağı xärbi operaśiyälärenä yärdäm itü öçen dön’ya külämendä qoral täêminatçıları êzli. Uzğan ayda Tön’yaq Koreya “Vagner” öçen Rusiyägä raketalar häm reaktiv tup yädräläre tapşırdı,”-dide ul jurnalistlarğa yasağan belderüendä. Kirbi äytüençä, Vagner Ukrainada här ay 100 million dollardan artıq aqça sarıf itä.
“Vagner”ğa tapşırılğan material külämeneñ Ukrainadağı suğış dinamikasın üzgärtmäyäçägen uylıybız. Tik Tön’yaq Koreyanıñ tağın da kübräk xärbi arsenal cibärergä planlaştıruı mäs’äläsendä borçuıbız bar,”-di Aq Yort wäkile.
Tön’yaq Koreya tışqı êşlär ministrlığınnan yasalğan belderüdä isä ilneñ Rusiyä belän arasında berqayçan da tormışqa aşmağan “qoral säwdäse” mäs’äläsendä prinśipial’ poziśiyäseneñ üzgärmäwe citkerelde.
Rusiyä däwlät başlığı Vladimir Putinğa yaqınlığı belän bilgele, “Vagner”nıñ başında toruçı êşmäkär Yevgeniy Prigojin da Kirbineñ süzlären “ğaybät häm spekulyaśiyä” dip atağan buldı.
