Greśiyädä çegännär rizasızlıq belderä

Greśiyädä 5nçe dekabr’dä poliśiyä ut açqannan soñ awır yaralanğan häm kiçä xastaxanädä ülgän 16 yäş’lek bala öçen başqala Afinada oyıştırılğan rizasızlıq çarasında ğawğa çıqtı.

Ğomere özelgän çegän Kostas Frangilus öçen şähär üzägendä cıyılğan törkem ğadellekkä çaqırdı häm “Çegännärneñ ğomere qıymmätle” digän şiğar’lär qıçqıra. Demonstrantlar häm poliśiyä arasında bulğan kiyerenkelek näticäsendä iminlek köçläre cıyıluçılarnı taratu öçen äçe gaz häm basım astındağı su qullana. Waqıyğalarda bik küp keşe qulğa alına, ber demonstrant yaralana.

Frangilus öçen Salonikinıñ Kamara rayonında da xalıq cıyıla. Alar şähär üzägendä protest marşı oyıştıra häm poliśiyäneñ dähşätenä qarşı şiğar’lär qıçqıra.

Afinanıñ könbatışındağı Aspropirgos rayonınıñ çegän kvartalında timer yul yänäşäsendä ut törtälär. Şul säbäple poyızd reysları kiçekterelä. Başqalada çegännär yäşi torğan urınnarğa avtobus reysları da saqlıq yözennän tuqtatılıp tora.

İsegezgä töşeräbez, 5nçe dekabr’dä Greśiyäneñ Saloniki şähärendä “tuqta” kisätüen ütämiçä qaçuçı maşina yörtüçegä poliśiyä ut aça. Rul’ artında utırğan 16 yäş’lek Kostas Frangilusnıñ başı awır yaralana häm ul reanimaśiyägä salına.  

Greśiyäneñ poliśiyä idaräsennän yasalğan belderüdä balanı satıp alğan benzinnıñ aqçasın tülämiçä kitkän öçen êzärlekläwläre äytelä. Anıñ poliśiyädän qotılu öçen maşinanı xätär räweştä qullanuı häm kisätülärgä iğ’tibar itmäwe citkerelä.  İminlek saqçıları balanı ike tapqır atıp tuqtatırğa tırışa.

İpokrateo xastaxanäsennän belderülärençä, 5nçe dekabr’dän birle reanimaśiyädä yatqan bala kiçä irtän özelgän.