Balçıq çığaruçı kar'yer awıl keşeläre östenä işelde

Hindstannıñ Çxattisgarx töbägendä aq balçıq çığaruçı kar’yernıñ işelüe arqasında 6 keşeneñ ğomere özelde, 3se yaralandı.  

“Hindustan Times”nıñ xäbärenä qarağanda, êzläw-qotqaru êşläre näticäsendä 5 keşeneñ üle gäwdäse tabıla. Yaralanğan 4 keşeneñ berse isä xastaxanädä can birä.

Ülüçe 6 keşeneñ 5se xatın-qız.

İminlek xezmätkärläre äytüençä, kar’yer awıl keşeläre tufraqnı qazığan waqıtta işelä.

Cirle wäqalätlelär ğomere özelüçelärneñ ğailälärenä kompensaśiyä tülänäçägen belderde.