Qorallı bäreleş 18 keşeneñ ğomeren özde

Kolumbiyädä inqıylabçı qorallı köçlärneñ qoral taşlamağan qayber äğ’zaları belän “Çik komandaları” dip ataluçı törkem arasında çıqqan bäreleştä 18 keşe hälaq buldı. Waqıyğa Putumayo administrativ üzägeneñ Puêrto-Gusman şähäre tiräsendäge Los-Pinos häm Las-Delisias awıllarında bula.

Puêrto-Gusman mêrı Êdison Xerardo Mora Rojas üzeneñ belderüendä ike qorallı törkem arasında bäreleş çığuın rasladı. Ul qaysı yaqtan niçä keşe ülüen älegä açıqlıy almawların, barlığı 18 mäyet barlığın citkerde. Ülüçelärne kriminal’ mediśina üzägenä alıp kitkännär.

Kolumbiyä inqıylabçı qorallı köçläre (FARK) yartı ğasırdan artıqqa suzılğan bäreleşlärdän soñ 2017nçe yılnıñ 27nçe iyünendä qullarındağı soñğı qoralnı BMOğa tantanalı räweştä tapşırğan ide.