BMO aşlıq kileşüen yañartuğa ömetlänä

BMO ğomum särqatibe Antonio Guterriş Qara diñgez aşlıq kileşüen yañartu öçen barlıq kirtälärne beterergä tırışuların belderde. Wäqalätle zat G20 sammitınnan alda uzdırğan matbuğat cıyılışında çaranıñ kritik çorda uzuın, dön’yanıñ här cirendäge keşeläneñ tormış qıybatlılığı häm klimat üzgärü yoğıntılarınnan tirän tetränü kiçerüen äytte. Ul üsep kilüçe illärneñ açlıq häm yuqsıllıqnı kimetü, daimi üseşkä investiśiyä kertü öçen finanslarğa ireşä almawın añlattı.

“G20 iq’tisadların global’ kön’yaq xökümätläre üz investiśiyälären täêmin itä alsın öçen Totrıqlı üseş öçen maqsatlar paketı qabul itärgä çaqıram. Bu azıq-tölek häm ênergetika krizisların ciñeläytü, tağın da kübräk qıyınlıqlarğa yul quymaw öçen kiräkle adım,”-dide Guterriş.

BMO ğomum särqatibe Qara diñgez aşlıq kileşüeneñ bazarlarnı totrıqlı xälgä kiterü häm azıq-tölek bäyälären töşetügä yärdäm itüen belderde. Ul aşlıq koridorınıñ tiz arada yañartılırğa tiyeşlegen assızıqlap bolay dide: “Rusiyäneñ aşlığı häm aşlamasın êksportlaw qarşındağı kirtälärne beterü mäs’äläsendä alğa kiteş bar. Tırışlıqlarıbız uñışlı bulır häm başqa qarşılıqlarnı da betererbez dip ömetlänäm”.